Wartäberg Zwoi gegä dr BSC Ü-Fuffzich Ois

Bild von dr Glaus (vor seine deiflische Rügaschmerzä)

Weil koi anderer Schrifglährter derbei war, verzählt halt dr Glaus ebbes von dem Schbiel:

 No gfahra senn mer mit dem schickä Audo vom Eschdi und weil der so an guata Navvi hot, hen mer au des exotische Schportplätzle am Rande der Schtadt (oder wia mer bei ons sagt: außer Etters) gfondä.

Weil einige von ons Blessurä hen (mir hot dr Rückä au arg weh do) hot dr Karschten  sein großä Bruader Jörg mitbrocht  ond der hot em Dor subber gschbielt und eiwandfrei ghaltä.

Ond au dr Hecki hot dr Bernd agdivierd, der vorm Schbiel Gschichtä von seiner Rückägruppe mit de 60-jährige Frauä verzählt hot.

Ogfangä hot des Schbiel zemlich mäßig ond mir schpekulierdt, dass bei de Wartäbärger au a baar von dr erschtä Mannschaft mitgschbield henn. Weil die Mannschaftsaufschdellung aber net em Schbielbericht em Inderned dren isch, han i des jetzt gar ned rescherschierä kennä.

Deswägä hättet mir nadierlich net so viele Fehlpäss machä müssä, aber des war vielleicht au a mendales Broblem.

 ( I woiss jetzt gar ed, worom mei Rechtschreibprogramm älles rot onderschdreichd, ko des koi schwäbisch?)

En dr Deffensive waret mir uff jeden Fall zemlich guat und do isch dr Maschterplan vom Koutsch au einwandfrei aufgangä. Dass dr Scheibi oin omhuft, des ko jo scho ammol bassierä und wenns no, wie en dem Fall em Schtrofraum isch, no gibt’s halt en Elfmeder (do hot dr Schiri sogar amol d Hand aus dr Hosädasch nemme missa, weil er jo pfeiffa missä hot, vorher hot er bloss dr Frang net mitschpiela lassä,weil der a lange Hos oghet hot on mr seine Schtutza net sähä kennä hot).

Den Elmeder henn die Dackel an de Pfoschtä knalld ond dr Jörg hot sich wahrscheinlich dengd: Ätschegäbele, so mached ir mir mei Schdadischdig ( en dr Säson no koi Gegädor en dr Ü-Fuffzich kassiert) et kabudd.

En dr Halbzeid hen mer au nix bessers zom Beschbrechä ghet als dass diä doch beschdimmd a Baar von der Erschdä derbei henn ond dass mer bis jedzd ganz zfriedä sei kennet ond mer so weidermached.

Jetzd henn die Granadädaggel aber den Sembbi omghauä ond rod amol wo: em Schtrofraum ond der Schiri htr scho wiedr sei Daschäbilliard (beim Schtand von 3:2 fürs lenge Oi) onderbrechä missä. Ond der Karschten hot sich ed so bled ogschtellt wia der Wardäbärger ond hod den Ball ganz humorlos versengt.

Ond dr Frang (der hod jedzd doch mitschbielä dürfa, aber vom Schiri glei amol d gälba Kart griegt, weil er scho auf em Blatz war, bevor der Auswäxler den verlassä hot) hot no auf seine unnachamliche (ond manchmal au hefdig gridisierde Ard) seine Gegner verarscht ond sauber abgschlossä.  Jedzd hen mer also 2:0 gfüart ond obwohl die Wartäbärger no mol gräftig Druck gmacht henn ( mit denne Kerlä aus dr Erschtä), hen mir ons die Budder nemme vom Brot nemmä lassä, was ein Verdienscht onserer guada Laufleischtung und de guade Reaktionä vom Jörg inklusive dessen bravuröser immer wieder gezeigder  Fauschtabwehr war.

No henmer en denne scheene Duschä, wiä se em Oschdä üblich send, dr Schwoiß abgwäschä ond dr Schreibi hod no a baar Gläslä Gerschtäkaltschale schbendiert. Dr Glaus hot no no a baar mol drauf hingwiesä, dass mer jetzt die beschde Abwehr en dr Liga hän (zammä mit de Rudower) aber dr Sylaff Uwe den erschdä  Blatz en dr Dorjägerlischde jedzt mit dem Albrecht von Blau Weiß  doile muss, ond dass des den beschdimmd saumäßig ärgerd, wenn der sei Combiuderle em Gschäft oschmeisst)

No war der Obend au wieder glaufä ond i han meiner Frau dohoim verzählt, dass des gar koi Geld koschtet hot ond i sogar omsonscht duscht han. No war die au zfriedä und noch meim kaputtä Greiz hot se gar et gfrogt.

Mit auf emBlatz waret: dr Jörg, dr Schreibi,  dr Eschdi, dr Sembbi, dr Bernd, dr Hecki, dr Karschten ond dr Frang ( nochdem er sei Zigarettle graucht hot ond sei langä Hos auszogä hot)